МІНСК, 18 вер — Sputnik. Прымушаць ісці замест урокаў прыбіраць бульбу настаўнікаў не павінны, заявіла ў панядзелак журналістам намеснік міністра адукацыі Беларусі Раіса Сідарэнка.
Не так даўно ў інтэрнэце з'явілася інфармацыя аб тым, што настаўнікаў з Пастаўскага раёна прымушаюць ісці на сельскагаспадарчыя працы — у тым ліку, прыбіраць бульбу. Сітуацыю пракаментавалі ў Мінадукацыі.
"Калі настаўнікі, як і любыя работнікі іншай сферы, вырашаць дапамагчы сельскай гаспадарцы, то заключаюцца адпаведныя дамовы, і яны працуюць там — у гэтым няма ніякай праблемы. Гаворка не ідзе пра тое, што настаўнікі працуюць замест свайго працоўнага месца на полі. Безумоўна, яны выконваюць сваю нагрузку і заняткі ў школе вядуцца", — заявіла Сідарэнка.
Намеснік міністра паабяцала ўдакладніць па Пастаўскаму раёну, "чаму паўстала праблема". Аднак у настаўнікаў, нагадала Сідарэнка, шасцідзённы працоўны тыдзень, і замест урокаў адпраўляць іх "у поле" няправільна.
"Калі кагосьці прымушаюць замест урокаў ісці прыбіраць бульбу, то мы па канкрэтнай сітуацыі разбяромся. Безумоўна, такога быць не павінна", — сказала Сідарэнка.
У мінулым годзе на зборы бульбы загінула школьніца з Маладзечна Вікторыя Папчэня — на дзяўчынку наехаў грузавік. Пакараныя абмежаваннем волі пасля гэтага рэзананснага выпадку апынуўся як кіроўца, так і настаўнікі, якія суправаджалі дзяўчынку.
Пасля гэтага чыноўнікі заяўлялі аб тым, што школьнікаў прыцягваць да такіх работ нельга. Аднак, па шэрагу паведамленняў, замест дзяцей працаваць на зборах ураджаю адправілі настаўнікаў.
