МІНСК, 5 кра — Sputnik. Міжнародная адукацыйная акцыя "Татальны дыктант" пройдзе 14 красавіка, ужо ў трэці раз у ёй прыме ўдзел беларуская сталіца.
За 15 гадоў існавання праект няўхільна пашырае геаграфію: у 2018-м годзе дыктант пройдзе ў 1000 гарадах у 75 краінах свету.
У Мінску праверыць сваю пісьменнасць можна будзе на чатырох пляцоўках:
- у Беларускім дзяржаўным медыцынскім універсітэце;
- у Навуковай бібліятэцы БНТУ;
- у Расійскім цэнтры навукі і культуры;
- у Нацыянальнай бібліятэцы Беларусі.
Акрамя Мінску пляцоўкі адкрыюцца ва ўсіх абласных гарадах Беларусі, а таксама ў Бабруйску, Мазыры, Полацку і Рэчыцы.
У гэтым годзе арганізатары падрыхтавалі вялікую сямейную пляцоўку, дзе бацькі могуць пакінуць сваіх дзяцей на час напісання дыктоўкі. Для малых падрыхтуюць адукацыйны занятак.
Пісьменніца Гузэль Яхіна спецыяльна для акцыі напісала тэкст, які ў Мінску прачытаюць тэлевядучая і актрыса Святлана Бароўская, тэлевядучыя Алег Лепешанкоў і Кацярына Цішкевіч.
Беларуская сталіца ўжо ў трэці раз напіша "Татальны дыктант". У 2016-м годзе ў акцыі прынялі ўдзел 262 чалавекі, у 2017-м — 540 чалавек.
Татальны дыктант — штогадовая акцыя па праверцы пісьменнасці для ўсіх жадаючых, незалежна ад узросту, нацыянальнасці, узроўню адукацыі і сацыяльнага статусу. Яна паказвае, што быць пісьменным важна для кожнага; што займацца беларускай мовай нялёгка, але займальна і карысна. Праект аб'ядноўвае ўсіх, хто ўмее ці хоча пісаць і гаварыць па-руску. Унікальныя тэксты для дыктоўкі ствараюць вядомыя пісьменнікі. Галоўнай пляцоўкай "Татальнага дыктанта" гэтага года стане Далёкаўсходні федэральны ўніверсітэт, дзе дыктант прачытае аўтар тэксту Гузэль Яхіна.
