МІНСК, 16 ліс - Sputnik. Беларускія медыкі, педагогі і сілавікі першымі атрымаюць расійскую вакцыну ад каронавіруса пасля выпрабаванняў, паведаміў галоўны дзяржаўны санітарны ўрач і намеснік міністра аховы здароўя Аляксандр Тарасенка ў эфіры тэлеканала "Беларусь 1".
"У першую чаргу вакцынацыі будуць падлягаць медработнікі, педагогі і ваеннаабавязаныя або сілавікі, як мы часцей гаворым", - адзначыў намеснік міністра.
Паводле яго слоў, даследаванні вакцыны "Спутник V" павінны скончыцца напрыканцы лістапада. У Беларусі ўжо прынята рашэнне аб яе ўжыванні ў 2021 годзе ў выпадку, калі яна будзе прызнаная бяспечнай для насельніцтва. Плануецца, што вакцыну атрымае каля двух мільёнаў беларусаў.
"Хацелася б, каб гэтая лічба была не менш за 1,8 мільёна ці нават два мільёны для таго, каб імунная праслойка стварылася", - растлумачыў Тарасенка.
Прадстаўнік Міністэрства аховы здароўя дадаў, што добраахвотнікі, якія прымалі ўдзел у выпрабаванні расійскай вакцыны, адчуваюць сябе добра.
У Беларусі назіраецца рост колькасці хворых на каронавірус. За апошнія суткі выяўлена 1 315 новых выпадкаў заражэння. Паправіліся і былі выпісаныя са шпіталяў 1 506 пацыентаў, памерлі сем чалавек.
Чытайце таксама:
- У Паўднёвай Карэі адкрыецца вытворчасць расійскай вакцыны "Спутник V"
- Першую партыю вакцыны "Спутник V" даставілі ў Індыю
- Вакцына "Спутник V" запускаецца ў масавую вытворчасць у Расіі
