МІНСК, 11 мая — Sputnik. Фестываль-рэканструкцыя "Залатая шпора. 1812" пройдзе 11 чэрвеня на базе конна-гістарычнага клуба "Залатая шпора", паведамілі Sputnik арганізатары фэста.
"Гасцей свята чакае максімальнае паглыбленне ў эпоху "апошняй прыгожай вайны" — эпоху Напалеона", — сказалі рэканструктары.
Па задумцы арганізатараў, дзеянне разгорнецца ў беларускай сядзібе, якая напачатку XIX стагоддзя апынулася ў цэнтры падзей — корпус французскага маршала Даву наступае, а расійскія войскі з баямі пакідаюць пазіцыі.
Напрацягу дня наведвальнікаў фэсту чакаюць сапраўдныя "Вайна і мір". Балі і традыцыйныя кірмашы, звон шабляў на двубоях, народныя абрады і песні, рокат гармат і ружэйная страляніна ў грандыёзнай баталіі — усё гэта чакае гледачоў на некалькіх пляцоўках.
Арганізатары абяцаюць максімальны інтэрактыў — касцюмы можна будзе апрануць, а зброяй навучыцца карыстацца, таксама можна прыняць удзел у балі. Госці фестывалю, якія прыйдуць у традыцыйных беларускіх строях, атрымаюць зніжкі.
Дзе: вёска Міжрэчча, Валожынскі раён.
Калі: 11 чэрвеня.
