На YouTube з'явіўся ролік, які распавядае гісторыю нашай краіны меньш чым за 5 з паловай хвілін. Прадзюсарам і рэжысёрам відэа з'яўляецца беларуска Воля Дземка — рэжысёр, фэшн-фатограф, фолк-спявачка і лінгвіст, якая жыве ў ЗША і вельмі зацікаўленая ў тым, каб распаўсюджваць родную культуру сярод замежнікаў. Відэа ўяўляе сабой урывак з дакументальнай стужкі "Песні старой Еўропы — старажытныя беларускія народныя песні".
У роліку сцвярджаецца, што беларускія народныя песні можна аднесці да найстаражытнейшых спеваў у Еўропе, якія захаваліся ў нязменным выглядзе. Фрагмент з дакументальнай стужкі, якую хутка можна будзе набыць на DVD ці паглядзець у сеціве, распавядае пра гісторыю Беларусі – ад антычнасці – першага пісьмовага ўпамінання насельніцтва гэтай тэрыторыі Герадотам – да нашых дзён.
Відэа даступна на беларускай і англійскай мове.
У роліку ў якасці эксперта з'яўляецца Сяргей Траццяк, кандыдат гістарычных навук, старшы навуковы супрацоўнік Інстытута гісторыі Нацыянальнай Акадэміі навук Беларусі. Анімацыю стварылі Юлія Рудзіцкая, Анатоль Тадорскі, апошні зрабіў і камп'ютарную графіку. Тэкст чытае народны артыст Беларусі Віктар Манаеў.
