МІНСК, 27 кра — Sputnik. Беларусь выступіла з ініцыятывай заснаваць Міжнародны дзень памяці пра чарнобыльскую катастрофу, паведамілі Sputnik ў прэс-службе Міністэрства замежных спраў Рэспублікі Беларусь.
Напярэдадні ў штаб-кватэры ААН у Нью-Ёрку адбылося памятнае пасяджэнне Генеральнай Асамблеі, прысвечанае 30-годдзю аварыі на Чарнобыльскай АЭС. З прапановай зладзіць мерапрыемства выступілі Беларусь, Расія і Украіна. Рэспубліку Беларусь на пасяджэнні прадставіла кіраўнік ірландскай дабрачыннай арганізацыі "Міжнародны праект — Дзеці Чарнобыля" Эдзі Роўч.
"У сваім выступе Эдзі Роўч прапанавала абвясціць 26 красавіка Міжнародным днём памяці пра чарнобыльскую катастрофу", — распавялі ў МЗС.
У прэс-службе знешнепалітычнага ведамства падкрэслілі, што ўпершыню ў гісторыі афіцыйных пасяджэнняў Генасамблеі ААН ад імя дэлегацыі дзяржавы-ўдзельніцы арганізацыі выступіў прадстаўнік замежнай дзяржавы.
"Беларусь дала права выступіць ад свайго імя прадстаўніцы Ірландыі з тым, каб наглядна прадэманстраваць як глабальны характар наступстваў чарнобыльскай тэхнагеннай катастрофы, так і адсутнасць бар'ераў для згуртавання шматнацыянальных намаганняў па іх пераадоленні і дапамогі пацярпелым", — растлумачылі суразмоўцы агенцтва.
Галоўнай тэмай сусветных і беларускіх СМІ ўвесь аўторак, 26 красавіка, заставалася гадавіна трагедыі. У знамянальную для рэспублікі дату ў касцёлах і храмы маліліся за хворых і загінуўшых. Кіраўнік дзяржавы Аляксандр Лукашэнка наведаў пацярпелыя ад аварыі на ЧАЭС раёны ў Гомельскай вобласці.
