МІНСК, 21 ліп — Sputnik. Экіпажы беларускай каманды "МАЗ-СПОРТаўта" завяршылі 12-ы этап ралі-рэйду "Шаўковы шлях" у дзясятцы лепшых.
Лепшым з беларусаў зноў стаў экіпаж Сяргея Вязовіча, фінішаваўшы сёмым, услед за ім, на восьмай пазіцыі, на фініш спецучастка прыехаў МАЗ пад кіраўніцтвам Аляксандра Васілеўскага, дзявятым — экіпаж Аляксея Вішнеўскага.
Пераможцам этапу стаў расійскі гоншчык Эдуард Нікалаеў на Камазе, другое і трэцяе месцы занялі яго сакаманднік — Айрат Мардзееў і Дзмітрый Сотнікаў.
У выніковым заліку грузавікоў пасля 12-га этапа два першыя месцы — у пілотаў "КАМАЗ-МАЙСТАР" Мардзеева і Сотнікава, трэцюю пазіцыю займае экіпаж галандца Марціна ван дэн Брынка на Renault. Экіпаж Вязовіча займае сёмы радок агульнага заліку, МАЗ Васілеўскага — на дзявятай пазіцыі, экіпаж Вішнеўскага спыніўся за крок ад ТОП-10.
Вынік заліку пазадарожнікаў пасля завяршэння этапу перайначыўся: першым да фінішу прыбыў француз Себасцьян Леб, аднак ён атрымаў чатырохгадзінны штраф за пропуск двух кантрольных кропак. У выніку пераможцам стаў яшчэ адзін пілот каманды Peugeot — Сірыль Дзепрэ. Другі радок заняў пілот з Саудаўскай Аравіі Язід Аль-Раджы, трэцім стаў расійскі гоншчык Уладзімір Васільеў.
У выніковым заліку лідзіруе Дзепрэ, другім ідзе Аль-Раджы з адставаннем у крыху больш за паўгадзіны ад лідэра, трэці — расіянін Васільеў.
