МІНСК, 2 вер — Sputnik. Тэлеканал "Беларусь 2" абвясціў пра старт набору айчынных экстрасэнсаў у свой новы праект, паведамілі Sputnik у прэс-службе Белтэлерадыёкампаніі.
Папулярны фармат перадачы, дзе экстрасэнсы даказваюць існаванне сваіх містычных здольнасцяў, дайшоў і да Беларусі, яго рэалізацыяй зоймецца моладзевы тэлеканал "Беларусь 2".
"Чалавек здольны на многае з таго, што большасці з нас здаецца немагчымым. Тэлеканал "Беларусь 2" вырашыў адшукаць унікумаў, якія змогуць пераканаць: няма нічога больш фантастычнага за рэальнасць, а містыка дзесьці побач", — паведамілі ў Белтэлерадыёкампаніі.
Шоу будзе называцца "Хачу ў тэлевізар. Экстрасэнсы", яго абяцаюць паказаць у эфіры без мантажу, спецэфектаў і агучкі — "без купюр".
Ахвотным паўдзельнічаць у шоў трэба запоўніць анкету на сайце тэлеканала belarus2.by, а затым даслаць яе на паштовую скрыню belarus2@tvr.by.
Калі набярэцца дастатковая колькасць заявак, тэлеканал вызначыць даты старту кастынгу.
Тэлеперадачы з удзелам рознага роду экстрасэнсаў, чараўніц і чараўнікоў папулярныя ва ўсім свеце. На расійскім і ўкраінскім тэлебачанні адзін з самых папулярных тэлефарматаў — "Бітва экстрасэнсаў", у якой людзі спаборнічаюць у ступені валодання містычнымі здольнасцямі.
Прапанаванае Белтэлерадыёкампаніяй шоу будзе выканана ў некалькі іншым ключы.
