МІНСК, 6 вер — Sputnik. Букмекеры прымаюць стаўкі на магчымых лаўрэатаў Нобелеўскай прэміі міру, сярод якіх шмат як палітыкаў і грамадскіх арганізацый, так і заходніх зорак.
Уладальнікаў Нобелеўскай прэміі міру абвяшчаюць у кастрычніку. На атрыманне ўзнагароды за ўмацаванне міру на зямлі і прасоўванне гуманістычных каштоўнасцяў могуць быць вылучаны як дзеячы, так і арганізацыі і нават краіны. У розныя гады лаўрэатамі прэміі станавіліся амерыканскі прэзідэнт Барак Абама, першы прэзідэнт СССР Міхаіл Гарбачоў і Еўрасаюз.
Галоўныя фаварыты сёлета — жыхары астравоў Грэцыі, якія не толькі ўзялі на сябе першы ўдар па прыёме сірыйскіх бежанцаў, але і ратавалі іх ад гібелі ў моры.
Таксама высокія стаўкі на прэзідэнта Калумбіі Хуана Мануэля Сантаса і лідэра ФАРК Радрыга Ланданья Эчэвэры, якія падпісалі пагадненне аб спыненні ўзброенага канфлікту ў краіне. Замыкае тройку фаварытаў Міжнародная кампанія за знішчэнне ядзернай зброі.
Далей у спісе ў букмекераў ідуць Папа Рымскі Францыск і канцлер ФРГ Ангела Меркель. Таксама сярод магчымых прэтэндэнтаў — французскі народ, Эдвард Сноўдэн і амерыканскія знакамітасці: Кан'е Уэст і Кім Кардаш'ян.
Прымаюць стаўкі і на кандыдата ў прэзідэнты ЗША ад Рэспубліканскай партыі Дональда Трампа — аднак, сярод усіх прэтэндэнтаў, на думку букмекераў, у яго самыя нізкія шанцы. Імёны суіскальнікаў прэміі Нобелеўскі камітэт трымае ў таямніцы — паводле статуту прэміі, іх змогуць абвясціць толькі праз 50 гадоў. Таксама праз паўстагоддзя можна будзе даведацца і прычыны таго, чаму камусьці была прысуджана прэмія, а камусьці — не.
