МІНСК, 23 вер — Sputnik. Сёння ў Мінску адкрыўся першы навагодні кірмаш. Сталічны ЦУМ вырашыў быць адной з першых крам, дзе ўжо можна купіць сувеніры і навагоднія ўпрыгажэнні.
"Гандаль усё пачынае планаваць яшчэ ўлетку. І ўвосень, калі ідуць дажджы — самы час пачаць ствараць святочны настрой", — распавяла ў эфіры радыё Sputnik Беларусь прэс-сакратар галоўнага ўпраўлення спажывецкага рынку Мінгарвыканкама Анастасія Прымака.
На навагоднім кірмашы можна купіць не толькі традыцыйныя сувеніры і ўпрыгажэнні, але і штучныя елкі, прычым як звыклыя зялёныя, так і самых нечаканых колераў, напрыклад, фіялетавага ці белага.
Што ж тычыцца ёлачных цацак, то летась асаблівай папулярнасцю карысталіся шкляныя шары з беларускім арнаментам і ўсялякія незвычайныя рэчы, напрыклад тэкстыльныя або керамічныя ўпрыгажэнні. Якія ўпрыгажэнні будуць у цане сёлета — пакажа час, якога да Новага года яшчэ дастаткова.
Сацсетка адрэагавала на гандлёвае ноу-хау з гумарам: "Гэтая такая новая беларуская традыцыя — спачатку святкаваць 100 дзён да Новага года, потым — два тыдні Новага года і 40 дзён — пасля".
Многія карыстальнікі прызнаваліся, што былі шчыра шакаваныя, убачыўшы пасярод восені ў краме Дзеда Мароза. Але не зважаючы на ўсё гэта, навагодні кірмаш ужо не пустуе — пакупнікі не без цікавасці разглядаюць навагоднія навінкі, праўда, пакуль, у асноўным, толькі прыцэньваюцца.
