МІНСК, 10 кас — Sputnik. Расследаванне злачынстваў, падобных да таго, што адбылося ў ГЦ "Еўропа" ў Мінску, патрабуюць комплекснага псіхолага-псіхіятрычнага суправаджэння, ад вердыктаў лекараў будзе залежаць і судовая перспектыва дадзенай справы.
Праваахоўныя органы паведамілі, што мінскі студэнт, які з бензапілой і сякерай прыйшоў забіваць людзей у ГЦ, і раней меў намер здзейсніць масавае забойства людзей з асаблівай жорсткасцю. Свае дзеянні ён патлумачыў дэпрэсіяй і нянавісцю да людзей.
"Ніхто з лекараў не будзе нават спрабаваць агучваць для прэсы магчымы дыягназ чалавека, затрыманага па такім гучным рэзанансным злачынстве. Затрыманы не адзін дзень і нават не адзін месяц правядзе ў стацыянары перш, чым яму паставяць дыягназ", — паведаміў Sputnik у панядзелак адзін з мінскіх лекараў-псіхіятраў з вялікім досведам працы.
Ад таго, якім будзе дыягназ, а прасцей кажучы, ці прызнаюць яго разумным або вар'ятам, будзе залежыць і рашэнне суда.
"Таму не трэба яго называць беларускім Брэйвікам. Хоць і можна знайсці нейкія аналогіі. І дзве ціхія краіны — Беларусь і Нарвегія, і абодва хлопцы з заможных сем'яў. У Брэйвіка прызналі наяўнасць свядомасці, і ён зараз адбывае пакаранне. Людзей жа, прызнаных шалёнымi, адпраўляюць лячыцца", — сказаў суразмоўца агенцтва.
"У Брэйвіка быў "маніфест" на 1,5 тысячы старонак, які прывёў у шок нават псіхіятраў, якія пабачылі ўсякае, а тут у наяўнасці цалкам іншая сітуацыя. Так што трэба чакаць, калі будзе заключэнне псіхолага-псіхіятрычнай экспертызы", — дадаў лекар.
Такое здарылася ўпершыню
Суразмоўца агенцтва адзначыў, што за сваю шматгадовую практыку лекара-псіхіятра не памятае, каб у Беларусі здараліся падобныя злачынствы.
"Ну, з 1982 года сапраўды такога не было, — сказаў ён. — Былі страшныя злачынствы, забойствы, згвалтаванні, здзейсненыя з асаблівай жорсткасцю. Але такога не было", — сказаў ён.
"Калі ўлічваць інфармацыю пра тое, што чалавек ужо лячыўся ў псіхіятараў, то можна казаць пра тое, што гэта старая, запушчаная праблема, магчыма звязаная з псіхічнымі, псіхалагічнымі траўмамі. Гаворка можа ісці і аб вострым псіхічным расстройстве. Яно магло здарыцца і не на фоне адмены лекавых прэпаратаў. Псіхіятрыя — гэта вельмі-вельмі складаная рэч", — сказаў доктар.
Дабяруцца да дзіцячага садка
Для складання карціны асобы затрыманага за здзяйсненне асабліва цяжкага злачынства будуць даследаваны ўсе вобласці яго жыцця, сказала суразмоўца агенцтва.
"Паколькі экспертыза праводзіцца ў рамках крымінальнай справы, то можна будзе запытваць і высвятляць абсалютна ўсю інфармацыю аб затрыманым. Аж да таго, якім цацкам ён аддаваў перавагу ў дзіцячым садку і якія меў стасункі з жанчынамі. У дадзеным канкрэтным выпадку ахвярамі сталі жанчыны, па ўзросце прыдатныя яму ў маці", — сказаў доктар.
"Калі следчыя вырашылі інтэнсіўна працаваць, то яны ў садок ужо схадзілі, альбо выявілі ўсіх нянек, хто займаўся яго выхаваннем і доглядам з ранняга дзяцінства", — растлумачыў доктар.
1% і ананімная дапамога
У тых выпадках, калі прызначаецца псіхолага-псіхіятрычная экспертыза, заводзіцца клінічная псіхіятрычная гісторыя хваробы. Часам прыцягваюцца спецыялісты з іншых абласцей, напрыклад неўролагі, псіхолагі, спецыялісты па розным паталогіям псіхікі, распавёў суразмоўца агенцтва.
Таксама ў абавязковым парадку збіраецца клінічны анамнез, які абследуецца, вывучаецца яго сямейная і асабістая гісторыя.
"Гэта неабходна для вызначэння базы, на якой маглі паўстаць любыя наяўныя ў чалавека змены псіхічнай сферы", — сказаў лекар.
Ён паведаміў, што паводле статыстыкі, у Еўропе не менш за 1% насельніцтва краін маюць дыягназ "шызафрэнія". Доктор таксама адзначыў, што ў Беларусі з 2012 года можна ў ананімным парадку звярнуцца па дапамогу да псіхіятараў.
