МІНСК, 27 кас — Sputnik. Папуляцыя жывёл у прыродзе на Зямлі, у тым ліку рыб, птушак, млекакормячых, земнаводных і рэптылій у перыяд з 1970 да 2012 года скарацілася на 58%, такія дадзеныя прыводзяцца ў дакладзе Living Planet Report 2016 Сусветнага фонду дзікай прыроды (World Wildlife Fund).
У фондзе канстатуюць, што калі такая тэндэнцыя захаваецца, да 2020 года на Зямлі будзе жыць ужо на дзве траціны менш пазваночных жывёл, чым у 1970 годзе.
"Дзікая прырода знікае на нашых вачах з беспрэцэдэнтнай хуткасцю, — сказаў генеральны дырэктар WWF Марка Ламберціні. — Справа не толькі ў выдатных і усімі любімых відах; біялагічная разнастайнасць фармуе аснову для здаровых лясоў, рэк і акіянаў. Прыбярыце жывёл, і гэтыя экасістэмы перастануць існаваць разам з чыстым паветрам, вадой, ежай і кліматам, які яны ствараюць для нас".
Пры падрыхтоўцы дакладу навукоўцы выкарыстоўвалі так званы індэкс жывой планеты (Living Planet Index, LPI), які таксама называецца індыкатарам глабальнай біяразнастайнасці.
Індэкс грунтуецца на ацэнках памераў асобных папуляцый дзікіх відаў жывёл, інфармацыю пра якія можна знайсці ў навуковай літаратуры. Разлік робіцца ў працэнтах ад велічыні папуляцыі на 1970 год для прэснаводных, лясных і марскіх экасістэм.
