МІНСК, 31 кас — Sputnik. Рэкордная за апошнія пяць гадоў колькасць краін пацвердзілі свой удзел у "Еўрабачанні-2017", паведамілі Sputnik у Еўрапейскім вяшчальным саюзе (EBU).
"Еўрабачанне-2017" пройдзе ў Кіеве ў наступным траўні. Паўфіналы адбудуцца 9 і 11 траўня, фінал конкурсу — 13 траўня.
Свой удзел у конкурсе ўжо пацвердзілі 43 краіны — гэта рэкордная з 2011 года колькасць удзельнікаў конкурсу. Прыме ў трэці раз ўдзел у "Еўрабачанні" і Аўстралія. Чуткі аб магчымым з'яўленні на папулярным конкурсе Казахстана і Кітая пакуль не пацвердзіліся.
Ўдзельнічаць у "Еўрабачанні" зноў будзе і Беларусь. Пакуль фармат і тэрміны нацыянальнага адбору на конкурс Белтэлерадыёкампанія не агучыла — па традыцыі выбар артыста на спаборніцтва праходзіць зімой.
Па словах арганізатараў, тэлеаўдыторыя "Еўрабачання-2016" перавысіла 200 мільёнаў чалавек — шоў з'яўляецца адным з самых папулярных у свеце тэлевізійных праектаў.
