Гідрамет: да канца тыдня падмарозіць - уначы да -10°С

МІНСК, 3 ліс — Sputnik. Пахаладанне чакаецца ў Беларусі да канца бягучага працоўнага тыдня: у ноч на суботу месцамі тэмпература ўначы апусціцца да —10°С, паведамілі Sputnik у Рэспубліканскім цэнтры па гідраметэаралогіі, кантролі радыеактыўнага забруджвання і маніторынгу навакольнага асяроддзя.

Па дадзеных Гідрамета, у чацвер Беларусь будзе знаходзіцца ў тылавой частцы цыклона з цэнтрам над Цвярской вобласцю: чакаецца пахмурнае надвор'е з ападкамі — мокрым снегам і дажджом. Тэмпература паветра ўначы складзе —2..+3°С, днём 0..+6°С. Атмасферны ціск уначы будзе слаба падаць, днём — слаба расці.

У пятніцу цэнтр цыклона зрушыцца ў Маскоўскую вобласць, і ў рэспубліку пачне паступаць халоднае паветра з поўначы Еўропы.

"У многіх раёнах пройдзе невялікі кароткачасовы снег, на асобных участках дарог чакаецца галалёдзіца. Мінімальная тэмпература паветра ўначы 0..-6°С, максімальная днём ад —2 да +4°С", — сказалі сіноптыкі.

Па словах суразмоўцаў Sputnik, у суботу 5 лістапада ноччу месцамі пройдзе кароткачасовы снег, днём ападкі прагназуюцца ў асноўным па заходняй палове краіны. Уначы будзе холадна: па паўночным усходзе пры праясненнях да —10°С. Днём тэрмометры пакажуць ад —3°С па паўночным усходзе Беларусі да +5°С па паўднёвым захадзе.