МІНСК, 3 ліс — Sputnik. Снегапады зімой адбываюцца з-за таго, што паветра не можа ўтрымваць у аблоках сняжынкі, і яны, дасягнуўшы вызначаных памераў, пад цяжарам уласнай вагі падаюць на зямлю, расказалі ў Гідрамеце.
Учора ў Мінску выпала першае снежнае покрыва, за ноч з 1 на 2 лістапада выпала пяць сантыметраў снегу.
Чаму ідзе снег?
"Калі льдзінкі знаходзяцца ў аблоках, яны ўяўляюць сабою мікраскапічныя крышталікі дыяметрам не больш 0,1 мм, але пры зліпанні з іншымі льдзінкамі і пры нарастанні новых крышталёў робяцца буйней і цяжэй", — расказаў Sputnik начальнік службы гідраметэаралагічных прагнозаў Рэспубліканскага цэнтра па гідраметэаралогіі, кантролі радыеактыўнага забруджання і маніторынгу навакольнага асяроддзя Дзмітрый Рабаў.
Па яго словах, паветраныя струмені ўжо не могуць утрымваць іх над паверхняй, таму па дасягненні вызначаных памераў пад цяжарам уласнай вагі сняжынкі падаюць на зямлю. "Такім чынам узімку і адбываюцца снегапады", — сказаў Рабаў.
Па яго словах, прынята лічыць, што снег падае, але насамрэч гэты працэс можна назваць "паданнем" толькі ўмоўна.
"Пры павелічэнні вагі сняжынкі высоўваюцца з аблокаў, пасля чаго іх падхапляюць ніжнія струмені паветра і перасоўваюць у розных кірунках — могуць панесці ўбок, падняць угару або апусціць на зямную паверхню", — расказаў Рабаў.
Ён таксама адзначыў, што падчас перасоўвання ў паветраных масах сняжынкі падпадаюць безлічы "небяспек".
"Калі на вуліцы стаіць ветранае і вільготнае надвор'е, нягледзячы на мароз, яны часткова падтаюць і выпадаюць на зямлю ў выглядзе мокрага снегу", — сказаў суразмоўца агенцтва.
Часам, па яго словах, крышталікі зусім не дасягаюць глебы, а выпараюцца ў паветры. Калі падчас лунання яны праходзяць некалькі этапаў раставання і замарожванні, то падаюць не шматкамі, а дробнымі шарыкамі, падобнымі на крупы.
Як утвараецца снег?
Спецыяліст расказаў, што ператварэнне лёду ў снег залежыць ад тэмпературы і вільготнасці паветра.
"Калі над паверхняй глебы тэмпература плюсавая, тады пры ападанні на зямлю льдзінкі растаюць і ператвараюцца ў ваду. Калі мінусовая, то па меры лунання ў паветры яны сутыкаюцца з іншымі льдзінкамі і склейваюцца паміж сабой", — сказаў ён.
"Спачатку кожная такая льдзінка мае няроўную форму, але з цягам часу з яе кандэнсуецца вільгаць, што прыводзіць да крышталізацыі і з'яўлення роўных шасціканцовых формаў. Надалей на гэтыя шасцікутнікі наліпаюць новыя крышталі, на іх — наступныя, у выніку выходзяць даволі арыгінальныя кампазіцыі з мудрагелістымі ўзорамі", — адзначыў сіноптык.
Пры нізкай вільготнасці ўсе сняжынкі могуць выглядаць аднолькава, пры высокай — маюць размаітыя формы, сказаў ён.
Чаму снег белы?
Рабаў расказаў, што белы колер снегу надае змешчанае ў ім паветра. "Пры кандэнсацыі вільгаці і наступным утварэнні крышталёў на паверхнях граняў сняжынак адлюстроўваецца святло, а паколькі яно з'яўляецца белым, то і колер снегу атрымваецца белым", — расказаў суразмоўца агенцтва.
Аднак, па яго словах, такое здараецца не заўсёды.
"Даўно даказана, што пры перасоўванні ў паветраных масах разам з кропелькамі вільгаці перасоўваюцца розныя мікраарганізмы і бактэрыі. З-за іх наяўнасці ў часціцах вады снег часам бывае не чыста белым, а з зелянявым ці шараватым адценнем", — адзначыў Рабаў.
