МІНСК, 9 ліс — Sputnik. Рассельгаснагляд прад'явіў прэтэнзіі шэрагу малакаперапрацоўчых прадпрыемстваў Беларусі ў сувязі з выяўленнем у пітным малацэ беларускай вытворчасці сухога малака, што недапушчальна па тэхрэгламенту, гаворыцца ў паведамленні расійскага нагляднага ведамства.
Раней Рассельгаснагляд неаднаразова прад'яўляў прэтэнзіі да беларускага малака, сыроў і іншай малочнай прадукцыі. Яны былі звязаны з наяўнасцю слядоў недапушчальных ветпрэпаратаў, няправільным афармленнем дакументацыі і іншымі прычынамі. Таксама выяўляліся факты фальсіфікацыі беларускай малочнай прадукцыі.
"Пры правядзенні лабараторных даследаванняў партый малака стэрылізаванага і пастэрызаванага Бранскай міжабласной ветэрынарнай лабараторыі выяўлена неадпаведнасць узораў патрабаванням Тэхнічнага рэгламенту Мытнага саюза ТР МС 033/2013 "Аб бяспецы малака і малочнай прадукцыі" ў якасным вызначэнні наяўнасці сухога малака", — гаворыцца ў паведамленні.
Усяго для даследавання было ўзята 18 пробаў пітнога малака. Адбор праводзіўся ў пунктах папярэдняга паведамлення "Чырвоная горка" і "Чырвоны камень", праз якія ў асноўным ідзе пастаўка беларускіх прадуктаў харчавання ў РФ.
Сляды сухога малака былі выяўленыя ў 11 узорах. У прыватнасці, сухое малако было выяўлена ў прадукцыі прадпрыемстваў "Здравушка-мілк", "Малочны свет", "Мазырскія малочныя прадукты", Мінскага малочнага завода №1.
Акрамя таго, у гандлёвым абароце Бранскай вобласці таксама выяўлены партыі малака, у складзе якой устаноўлена наяўнасць сухога малака. Тут прэтэнзіі прад'яўленыя прадпрыемствам "Бабулін гладыш", "Саўгас-камбінат "СОЖ" і "Мілкавіта".
Расійскае нагляднае ведамства распачало меры па спыненні абароту няякасных партый прадукцыі.
