МІНСК, 16 сне — Sputnik. Міжведамасная група па пропуску праз беларуска-расійскую мяжу грамадзян трэціх краін пачне працаваць у пятніцу, заявіў журналістам дзяржсакратар Саюзнай дзяржавы Рыгор Рапота.
Уезд на тэрыторыю Расіі праз памежныя пункты беларуска-расійскай мяжы для замежнікаў забаронены, бо гэтыя КПП не з'яўляюцца міжнароднымі. Упершыню такая праблема з'явілася ў пачатку восені, неўзабаве прадстаўнікі абедзвюх краін абяцалі яе вырашыць.
"У пятніцу будзе першае пасяджэнне міждзяржаўнай міжведамаснай рабочай групы па гэтым пытанні", — сказаў Рапота і дадаў, што група будзе працаваць у рэжыме відэаканферэнцыі.
"Нам трэба шукаць магчымасці, каб грамадзяне трэціх дзяржаў адчувалі сябе свабоднымі ў перамяшчэнні, пры гэтым каб выконваліся пытанні бяспекі. Пытанне ёсць, над ім трэба працаваць. Яно было прадметам абмеркавання на групе высокага ўзроўню, на пасяджэнні сумеснай калегіі МЗС Беларусі і Расіі", — растлумачыў дзяржсакратар Саюзнай дзяржавы.
Вытокі праблемы з пропускам праз мяжу
У пачатку верасня Польшча накіравала ў МЗС Расіі ноту, заявіўшы, што палякаў не прапускаюць на мяжы з Беларуссю. Па заявах польскага боку, супрацоўніка польскай дыпмісіі не пусцілі ў Расію, калі ён ехаў на асабістым аўтамабілі. Як патлумачылі тады Sputnik у пагранслужбе ФСБ РФ, прычына такіх абмежаванняў — адсутнасць міжнародных пунктаў пропуску (МПП).
Забарона на перасячэнне беларуска-расійскай мяжы замежнікамі прадугледжана яшчэ дамовамі 1995 года, аднак доўгі час расійскі бок ішоў насустрач замежнікам. Цяперашнюю сітуацыю патлумачылі складанай сітуацыяй у краіне і высокай тэрарыстычнай пагрозай.
Карэспандэнты Sputnik пабывалі на беларуска-расійскай мяжы восенню і ацанілі змены, якія адбыліся на дзяржаўных межах. Як распавядалі Sputnik відавочцы, замежнікаў сапраўды стала менш — прычынай гэтаму стаў і больш строгі кантроль нават на аб'язных дарогах.
