МІНСК, 16 сне — Sputnik. Біяметрычныя пашпарты і ID-карты з'явяцца ў Беларусі ў канцы 2018 года, паведаміў начальнік дэпартамента па грамадзянстве і міграцыі Міністэрства ўнутраных спраў Аляксей Бягун у пятніцу на прэс-канферэнцыі ў Мінску.
"Мяркуецца, што ў канцы 2018 года мы ўжо атрымаем біяметрычны пашпарт для выезду за мяжу і ID-карту з адпаведнымі праграмамі, якія будуць дазваляць рэалізоўваць тыя задачы, якія ў цяперашні час стаяць перад дзяржаўнымі органамі", — адзначыў Бягун.
Паводле яго слоў, ID-карта будзе выканана ў выглядзе пластыкавай карткі з біяметрычнай інфармацыяй, запісанай на чыпе.
Начальнік дэпартамента падкрэсліў, што такія карты кампактныя і зносаўстойлівыя, але самае галоўнае — іх практычна немагчыма падрабіць. Акрамя таго, па інфармацыі Бягуна, праходжанне пагранічнага кантролю з такімі карамі значна паскорыцца.
Начальнік дэпартамента таксама паведаміў, што МУС пачаў распрацоўваць Канцэпцыю дзяржаўнай міграцыйнай палітыкі на бліжэйшыя дзесяць гадоў.
Паводле яго слоў, у 2017 годзе будуць падрыхтаваны дакументы па ўнясенні змяненняў і дапаўненняў у закон аб прававым становішчы замежных грамадзян і асоб без грамадзянства, які накіраваны на спыненне нелегальнай міграцыі на тэрыторыі Беларусі.
