МІНСК, 2 лют — Sputniк. Беларускія кнігі ў 2017 годзе будуць шырока прадстаўлены на міжнародных выставах, паведаміла на пасяджэнні рэспубліканскага арганізацыйнага камітэта па падрыхтоўцы і правядзенні святкавання 500-годдзя беларускага кнігадрукавання журналістам міністр інфармацыі Лілія Ананіч.
Напрыклад, у Вільні ўжо на люты бягучага года запланаваны круглы стол, прысвечаны 500-годдзю беларускага і ўсходнеславянскага кнігадрукавання. Тэматычныя круглыя сталы таксама будуць арганізаваны ў Празе, Варшаве, Санкт-Пецярбурзе, Маскве, Пекіне.
У сакавіку нацыянальную кніжную экспазіцыю пакажуць падчас Парыжскай міжнароднай выставы.
Беларускія выданні на працягу года ўбачаць на Лонданскім кніжным кірмашы.
Ну а беларусы як айчынныя, так і замежныя навінкі пабачаць падчас Мінскай міжнароднай кніжнай выставы-кірмашу, якая традыцыйна пройдзе з 8 па 12 лютага ў адміністрацыйным комплексе па праспекце Пераможцаў, 14.
Многа мерапрыемстваў запланавана і на Дні беларускага пісьменства ў Полацку ў пачатку верасня.
