МІНСК, 20 лют — Sputnik. Ветранае надвор'е захаваецца ў Беларусі ў панядзелак 20 лютага, паведамілі Sputnik у Рэспубліканскім цэнтры па гідраметэаралогіі, кантролі радыеактыўнага забруджвання і маніторынгу навакольнага асяроддзя.
Раней сіноптыкі папярэдзілі, што няўстойлівае надвор'е захаваецца ў краіне як мінімум да аўторка, пры гэтым чакаецца, што да канца лютага маразоў ужо не будзе. "Будзе воблачна з праясненнямі, у асноўным па паўночнай палове краіны невялікія ападкі — мокры снег і дождж. Раніцай слабы туман, на асобных участках дарог галалёдзіца. Вецер паўднёва-заходні ўмераны, па поўначы парывісты", — сказалі ў Гідрамеце.
Там таксама паведамілі, што максімальная тэмпература паветра днём складзе ад 0 да +5°С.
У Мінску, паводле інфармацыі сіноптыкаў, без істотных ападкаў, а днём слупкі тэрмометраў падымуцца да адзнакі +2°С.
