МІНСК, 10 сак — Sputnik. У выставачнай зале Брэсцкага абласнога краязнаўчага музея 10 сакавіка адбудзецца адкрыццё выстаўкі "Раскрыем беражліва старонкі", прымеркаванай да 500-годдзя беларускага кнігадрукавання.
"Выстава заснавана на сапраўдных матэрыялах з калекцый дакументаў, жывапісу, графікі, нумізматыкі, фалерыстыкі. На ёй прадстаўлены старадрукаваныя і рэдкія кніжныя выданні розных эпох і дзяржаў, карціны і экслібрысы вядомых майстроў выяўленчага мастацтва Брэстчыны, памятныя медалі юбілейных дат у культурным жыцці Беларусі, знакі, маркі, канверты, паштоўкі з кніжнай сімволікай", — распавялі ў музеі.
Наведвальнікі ўбачаць адноўлены інтэр'ер букіністычнай крамы канца XIX — пачатку XX стст. са старадаўняй мэбляй і кнігамі.
Усяго на выставе экспануюцца больш за 110 прадметаў.
Па словах арганізатараў, выстава будзе цікавай і тым, хто займаецца буккросінгам. Для аматараў кнігі будзе падрыхтаваны кніжны квэст і зона для вольнага абмену кнігамі.
Выстава будзе працаваць да 14 траўня 2017 г.
