У віншаванні кіраўніка дзяржавы гаворыцца пра тое, што многія гады Уладыка Філарэт прысвяціў умацаванню ў грамадстве высокіх маральных ідэалаў, сапраўднага гуманізму і маральнасці. Нястомна накіроўваў свае сілы на захаванне міру і згоды ў нашай краіне, зацвярджэнне хрысціянскіх каштоўнасцяў, адраджэнне і прымнажэнне праваслаўных традыцый.
Уладыка Філарэт — адзін з самых паважаных іерархаў праваслаўнай царквы, з яго імем звязана адраджэнне рэлігійнага жыцця ў Беларусі, адкрыццё мноства новых прыходаў. Больш за 20 гадоў Мітрапаліт Філарэт быў прадстаяцелем Беларускай праваслаўнай царквы.
Аб постаці Мітрапаліта Філарэта і асабістым вопыце зносін з Уладыкам вядучым радыё Sputnik Беларусь распавёў настаяцель праваслаўнага прыхода ў гонар святога Мікалая Японскага айцец Павел Сярдзюк.
"Маштаб асобы Уладыкі Філарэта мы бачым па выніках яго архіпастырскай працы ў Беларусі. Трэба разумець, у які час і ў якую абстаноўку ён прыехаў, і якія плады яго знаходжання і служэння на беларускай зямлі. Гэта ўнікальны маштаб адраджэння царкоўнага жыцця ва ўсёй разнастайнасці яе формаў", — адзначыў святар.
Айцец Павел распавёў пра тое, што асабіста для яго, як і для многіх іншых прадстаўнікоў праваслаўнага духавенства, Уладыка Філарэт быў і застаецца духоўным бацькам.
"Як святар я пачынаў у пачатку 2000 гадоў. У адрозненне ад духавенства, якое прыняло крыж служэння яшчэ ў савецкія гады, мы, будучы новым пакаленнем, прыйшлі ўжо ў адноўленыя духоўныя школы на хвалі свабоды царквы ў шырокім грамадским жыцці", — сказаў святар.
Айцец Павел параўнаў Уладыку Філарэта з "вобразным біблейскім Маісеем, які выводзіў з зямлі рабства новае пакаленне".
"Я ўжо быў у тым пакаленні, якое не ведала ідэалагічнага і светапогляднага палону, і для нас царква была і застаецца вялікай радасцю. Беларуская праваслаўная царква ў тым статусе, у якім яна існуе сёння, і ў тым уплыве, які аказвае на розумы, гэта, несумненна, заслуга Уладыкі Філарэта", — канстатаваў святар.
Гутарку з настаяцелем праваслаўнага прыхода ў гонар святога Мікалая Японскага айцом Паўлам Сердзюком слухайце на радыё Sputnik Беларусь.
