МІНСК, 27 кра — Sputnik. Пісьменнік Аляксандр Тамковіч распачаў збор сродкаў на выданне кнігі "Мазаіка жыцця", якая будзе складацца з прыблізна 40 арыгінальных гісторый і 200 унікальных фотаздымкаў з сямейных альбомаў.
Па словах аўтара, праект, які складаецца з біяграфічных нарысаў выключна пра людзей творчасці, цалкам арыгінальны. Сярод герояў музыканты і спевакі Іван Кірчук, Зміцер Вайцюшкевіч, Алег Хаменка, Ігар Варашкевіч, Кася і Алесь Камоцкія, паэт Андрэй Хадановіч, культавы для моладзі пісьменнік Віктар Марціновіч, незвычайны скульптар Генік Лойка, надзеі айчыннага кіно — Андрэй Курэйчык і Андрэй Кудзіненка, культуролагі Сяргей Харэўскі і Юлія Чарняўская.
Аляксандр Тамковіч распавёў, што "людзі гаварылі са мной на той мове, на якой яны размаўляюць у звычайным жыцці. І я вельмі рады, што ў дадзеным выпадку яна ў большасці сваёй менавіта беларуская, хоць многія адказвалі і на рускай мове".
Па яго словах, пры падборы герояў "галоўным быў уклад канкрэтнай асобы ў беларускую культуру і, вядома ж, прыемная для ўсіх журналістаў камунікабельнасць суразмоўцаў".
"Вядомыя людзі распавядалі мне рэчы, якіх нельга знайсці ў афіцыйных энцыклапедыях. Напрыклад, спявак Зміцер Вайцюшкевіч узгадаў, як упершыню паспрабаваў алкаголь, а ў "ліхія дзевяностыя" спрабаваў гандляваць на Камароўскім рынку і патрапіў за гэта ў міліцыю, як спяваў у падземных пераходах Мінска", — падзяліўся падрабязнасцямі аўтар праекту.
Падтрымаць унікальны біяграфічны праект на 350 старонак, у які ўвойдуць каля 200 фота з сямейных альбомаў, а таксама азнаёміцца з умовамі яго стварэння можна тут.
