МІНСК, 2 мая — Sputnik. У Нацыянальны аэрапорт Мінск рэйсам Рым — Мінск прыбыло 69 гравюр (афортаў) Рэмбрандта, паведамілі Sputnik у прэс-службе мытні Мінск-2.
Калекцыя ўваходзіць у склад аднаго з найбуйнейшых збораў графікі ў Еўропе і прывезена для правядзення выставы арыгінальных твораў вялікага галандца, якая пройдзе з 5 мая па 3 ліпеня ў Нацыянальным мастацкім музеі.
"Мастацкія каштоўнасці пры ўвозе былі змешчаныя супрацоўнікамі мытні Мінск-2 пад працэдуру часовага ўвозу. Прадугледжаныя заканадаўствам формы мытнага афармлення і кантролю, для захавання графіка падрыхтоўкі выставы, праведзены прафесійна і ў самыя кароткія тэрміны", — адзначылі ў прэс-службе мытні.
Апошні раз такі вялікі збор работ вялікага галандца беларусы маглі пабачыць у 70-ыя гады мінулага стагоддзя. Самая вялікая калекцыя Рэмбрандта знаходзіцца ў Амстэрдаме ў дзяржаўным музеі.
