МІНСК, 11 ліп — Sputnik. Фестываль рыцарскай культуры пад Мсціславам праходзіць не першы год у межах святкавання Дня горада і з'яўляецца адным з найбуйнейшых беларускіх рыцарскіх фэстаў, сёлета ён пройдзе ў дзесяты раз 4-6 жніўня, распавялі карэспандэнту Sputnik у Мсціслаўскім райвыканкаме.
Мсціслаў нездарма называюць "Маленькім Вільнюсам" ці "беларускім Суздалем" — гэта прыгожы старажытны горад са шматвякавой гісторыяй. Горад быў заснаваны ў пачатку ХІІ стагоддзя.
"У першую чаргу фестываль арыентаваны на гледача, і гэта фэст не толькі для рыцараў. Ён выступае своеасаблівай інфармацыйнай базай, якой арганізатары імкнуцца падзяліцца з наведвальнікамі мерапрыемства. Прычым гэта тычыцца не толькі гістарычнай рэканструкцыі, але і гісторыі горада наогул", — распавялі арганізатары.
У праграме мерапрыемства запланавана мноства забаў, у тым ліку рыцарскія турніры і баталіі лучнікаў, штурм і спальванне замка. Конныя выступленні арганізуюць удзельнікі мінскага конна-гістарычнага клуба "Залатая шпора". Расійскае ваенна-спартыўнае аб'яднанне "Варта" правядзе паказальныя выступленні і гульні з гледачамі.
Падчас форуму адбудуцца майстар-класы па сярэднявечных танцах, канцэрт музычных гуртоў "Тутэйшая шляхта", Irdoraht, Rivia, Hardwood.
"Пачынаўся ён з зусім маленькага фестывалю, "фэсту для сяброў", але пачаў вельмі хутка развівацца. Улады горада заўсёды ідуць нам насустрач, яны зацікаўлены ў гэтым фестывалі і робяць усё магчымае, каб ён працягваў сваё існаванне", — распавяла карэспандэнту Sputnik распарадчык-каардынатар фестывалю Алена Ляміна.
Гасцей свята чакаюць тэматычныя спектаклі, а таксама некалькі шоу: монстар ад тэатра "Барысфен", вогненнае, цыркавое, неонавае.
На фарпастах горада спецыялісты мясцовай цэнтральнай бібліятэкі ў сярэднявечных касцюмах будуць сустракаць і частаваць гледачоў ахаладжальнымі напоямі, стравамі беларускай кухні.
Падчас экскурсіі ў Кармеліцкі касцёл Унебаўзяцця Божай Маці можна будзе пазнаёміцца з самым усходнім еўрапейскім помнікам "віленскага" барока, убачыць каля 20 фрэсак, якія адлюстроўваюць не толькі рэлігійныя, але і свецкія сюжэты, падняцца на адну з вежаў, з якой адкрываецца панарама "старога горада" і Замкавай гары.
Глядзіце ў фотастужцы Sputnik, што адбывалася на рыцарскім фэсце ў Мсціславе ў 2015-м —>>
