У рамках XXVI фестывалю мастацтваў "Славянскі базар у Віцебску" прайшоў міжнародны дзіцячы вакальны конкурс "Віцебск-2017", які па праву называюць дзіцячым "Славянскім базарам". І страсці там кіпелі ані меншыя, чым на сцэне віцебскага Летняга амфітэатра. Два дзесяткі юных канкурсантаў выканалі на сцэне канцэртнай залы "Віцебск" эстрадную песню кампазітара сваёй краіны на роднай мове, а геаграфія конкурсу ўжо даўно выйшла за межы славянскіх краін — у гэтым годзе ўдзельнічалі прадстаўнікі з ЗША і Кубы.
Пераможцай і ўладальніцай Гран-пры фестывалю стала 12-гадовая магіляўчанка Марыя Магільная, з песняй "Душы так хочацца святла", аўтарства Наталлі Скапец і Таццяны Шурынавай. Гала-канцэрт адбыўся 13 ліпеня ў канцэртнай зале "Віцебск". А пазней, у той жа дзень, на ўрачыстай цырымоніі адкрыцця "Славянскага базару" Марыя атрымала статуэтку "Залатая ліра" і прыз фестывалю з рук прэзідэнта Беларусі Аляксандра Лукашэнкі.
"Мне было вельмі прыемна, калі назвалі маё імя, мяне прама шчасце перапаўняла. Я прадставіла, што цяпер я пайду на адкрытую пляцоўку. Мне было вельмі прыемна выступаць у Летнім амфітэатры. Калі сам прэзідэнт даваў мне статуэтку, ён сказаў, каб у мяне было больш такіх значных конкурсаў. І, вядома ж, пажадаў удачы", — распавяла Марыя.
На "Славянскім базары" Марыя ўпершыню. Але ў апошнія два гады дзяўчынка ўдзельнічала ў нацыянальным адборы на дзіцячае "Еўрабачанне". Другі год запар яна заваёўвае прызы ў конкурсе "Зорныя кветкі", які праводзіцца пры падтрымцы Дэпартамента па знешнеэканамічных і міжнародных сувязях мэрыі Масквы, а таксама Дома Масквы ў Мінску.
Зараз у планах юнай зоркі адпачыць на вакацыях, а потым — зноў адказныя будні. Акрамя падрыхтоўкі да новых конкурсаў, наперадзе новы навучальны год і школа. А ў Доме Масквы рыхтуецца святочны канцэрт да пачатку новага навучальнага года, у якім прыме ўдзел і ўладальніца Гран-пры дзіцячага "Славянскага базару".
Гутарку з Марыяй Магільнай слухайце на радыё Sputnik Беларусь.
