МІНСК, 3 жні — Sputnik. Выстава "Беларускі кінематограф 1920 — 1930-х гг. у кінаплакаце" адкрыецца 7 жніўня ў Музее гісторыі беларускага кінематографа.
Экспазіцыя выставы складаецца з больш чым 30 поўнафарматных і поўнакаляровых рэпрынтаў кінаплакатаў да беларускіх фільмаў 1926 — 1940 гг. і адлюстроўвае асаблівасці савецкага кінаплаката 1920 — 1930-х гг., яго эвалюцыю ў сувязі з ператварэннем нямога кіно ў гукавое.
"На выставе прадстаўлены работы Уладзіміра Стэнберга, Максіма Літвака, Міхаіла Длугача, Ізраіля Бограда, Мікалая Хомава, Дзмітрыя Буланава, Барыса Зяленскага і Міхаіла Векслера — шэрагу вядучых майстроў інтэрнацыянальнай плеяды мастакоў-кінаплакатыстаў, наватарскія падыходы і творчыя дасягненні якіх спрыялі прызнанню савецкага кінаплаката першай паловы ХХ стагоддзя ўнікальнай мастацкай з'явай сусветнага значэння", — распавялі арганізатары.
Асаблівую ўвагу стваральнікі выставы звяртаюць на ўзоры кінаплакатнага мастацтва на беларускай мове, на кінаплакаты да героіка-прыгодніцкай драмы "Кастусь Каліноўскі" (паводле афіцыйных планаў, менавіта яна павінна была стаць фільмам-першынцам беларускага кіно), на тыя кінаплакаты, аўтары якіх акрамя выканання прафесійнай задачы змаглі выказаць асабістае стаўленне да матэрыялу канкрэтнага фільма.
У музеі падкрэслілі, што "выстава — вынік 15-гадовай пошукавай працы супрацоўнікаў Музея гісторыі беларускага кіно, якія паступова ліквідуюць "белыя плямы" мінулага беларускага кінематографа. Калекцыя кінаплакатаў да беларускіх фільмаў 1926 — 1940 гг. прадстаўлена ў такім аб'ёме пасля 75 гадоў забыцця".
Месца правядзення:
Музей гісторыі беларускага кіно (г. Мінск, вул. Свярдлова, 4).
Час працы:
Штодня з 10:30 да 18:30.
Кошт квіткоў:
3 руб. — дарослыя,
2,5 руб. — студэнты,
2 руб. — школьнікі і пенсіянеры.
