МІНСК, 14 жні — Sputnik. Па выніках конкурснага адбору 141 аўтар атрымаў права ўдзельнічаць у найбуйнейшай у Беларусі выставе-продажы "Восеньскі салон", паведамілі Sputnik у прэс-службе Белгазпрамбанка.
"Усяго было атрымана звыш 300 заявак ад патэнцыяльных удзельнікаў. Маладыя беларускія мастакі прадставяць на суд гледача свае працы, створаныя за апошнія тры гады ў самых розных відах і тэхніках выяўленчага мастацтва (жывапіс, графіка, скульптура, дэкаратыўна-прыкладное мастацтва, фатаграфія, інсталяцыя). Усе прадстаўленыя творы будуць выстаўлены на продаж", — удакладнілі арганізатары выставы.
Выстава "Восеньскі салон" пройдзе з 6 кастрычніка па 5 лістапада ў Палацы мастацтва ў Мінску.
Са спісам ўдзельнікаў можна пазнаёміцца тут.
Маштабны арт-праект "Восеньскі салон" праходзіць у Мінску з 2015 года і ўяўляе шырокую панараму творчасці маладых беларускіх мастакоў. У экспазіцыі 2016 года дэманстраваліся каля 500 аўтарскіх твораў. Усяго ў мінулым годзе ў праекце прынялі ўдзел 162 мастака, 9 мастацкіх галерэй. Больш за 50 работ знайшлі свайго пакупніка.
