Міжнародны фестываль феерверкаў "Навальніца" пасля перапынку вяртаецца ў Беларусь, у гэтым годзе свята пройдзе 26 жніўня ў гарналыжным комплексе "Лагойск" і зведала невялікія змены, расказаў яго арганізатар Ігар Сідаровіч падчас інтэрв'ю ў МПЦ Sputnik Беларусь у аўторак.
Упершыню "Навальніца" пройдзе ў фармаце Family Day. Для гледачоў, якія прыехалі сем'ямі, будзе прадугледжаны адпачынак на пляжнай зоне, фуд-корт, забавы для дзяцей.
Вечарам адбудзецца спаборніцтва трох каманд піратэхнікаў. Выступяць вядомыя спецыялісты з Расіі, якія раней афармлялі свята "Пунсовыя ветразі" ў Санкт-Пецярбургу, а таксама піратэхнічныя групы з Казахстана і Балгарыі.
"Чуў балгарскую кампазіцыю. У іх ёсць такі спявак Славі Трыфанаў, які з'яўляецца і культавым спеваком, і палітычным дзеячам. Ведаю, што кампазіцыя будзе заснаваная на яго трэках. Што рыхтуюць каманды Расіі і Казахстана, я не ведаю, таму што ёсць такі ўнутраны момант, як камерцыйная таямніца. Хутчэй за ўсё, мы даведаемся гэта толькі ў момант феерверка", — паведаміў Сідаровіч.
"Улічваючы, што ў гэтым годзе мы ўкладваемся ў адзін дзень, мы рыхтуем спецыяльнае шоў сцэнічнае з гуртамі "Ляпіс" і BRUTTO", — распавёў суразмоўца.
