МІНСК, 29 вер — Sputnik. Мінспорту і турызму распрацавала брэнды пяці турыстычных напрамкаў Беларусі і завяршае працу над брэндам краіны.
"Да канца года вынесем на абмеркаванне варыянты, каб не было як з брэндам Мінска, калі грошы асвоілі, а брэнда не атрымалася", — распавёў Міхаіл Партной падчас прэс-канферэнцыі ў межах турыстычнай выставы "Турбізнес-2017".
Нагадаем, кампанія INSTID згодна з кантрактам з інфармацыйна-турысцкім цэнтрам "Мінск" працавала над стварэннем брэнда сталіцы са жніўня 2012 года. Прадстаўлены брэнд сустрэў крытыку мінчукоў. Аўтары прапанавалі візуалізаваць Мінск у выглядзе блакітнай мікрасхемы, каб сталіца асацыявалася са сферай IT.
Гэтым разам брэнды прадставяць на абмеркаванне грамадскасці, не раскрываючы аўтарства кожнага з іх. Сярод прапаноў будуць варыянт Сусветнай турыстычнай арганізацыі, ЕС, прыватных піяр-кампаній, а пасля абмеркавання свой вердыкт вынесуць эксперты.
