МІНСК, 4 сне — Sputnik. Кіраўніцтва Нацыянальнага парку "Белавежская пушча" прыняло рашэнне аб тым, каб і на 2018 год падоўжыць мараторый на адстрэл ваўкоў, паведамляе інтэрнэт-партал Грамадскага аб'яднання "Ахова птушак Бацькаўшчыны".
Часовая забарона на адстрэл ваўкоў была ўведзена ў 2015 годзе. Да гэтага часу ваўкоў адстрэльвалі ў сувязі з ростам іх колькасці. Разам з лісамі і янотападобным сабакам ваўкі прызнаныя найбольш актыўнымі пераносчыкамі віруса шаленства і аднесены да катэгорыі шкодных жывёл, паляванне на іх дазволена круглы год.
У лісце дырэктара нацыянальнага парку Аляксандра Бурага ў адказ на запыт абаронцаў прыроды гаворыцца, што "воўк з'яўляецца абавязковым кампанентам экасістэм Белавежскай пушчы". Таксама дырэктар падкрэсліў, што ваўкі займаюць важнае становішча ў селекцыі капытных жывёл, лесааднаўленчых працэсах, зніжэнні колькасці драпежнікаў — пераносчыкаў эпізаатычных захворванняў. Па гэтых прычынах падоўжаны мараторый на адстрэл шэрых драпежнікаў у пушчы на наступны год.
У сваю чаргу каардынатар праграм па Белавежскай пушчы Віктар Фенчук назваў дадзенае рашэнне кіраўніцтва Нацпарку "ўзважанай палітыкай" у пытанні аховы прыроды.
Як адзначылі навукоўцы, воўк адносіцца да сямейства сабак (Canidae). Гэта абарыгенны еўрапейскі від драпежных звяроў, у XIX — XX стагоддзях цалкам знішчаных у краінах Еўропы. У цяперашні час Беларусь па колькасці ваўка з'яўляецца лідзіруючай у Еўропе краінай. На тэрыторыі Беларусі з 1915 па 1997 гады назіралася чатыры ўспышкі росту колькасці ваўка (у 20-ых, 40-ых, 70-ых і 90-ых гадах), тады прымаліся рашэнні аб масавым адстрэле драпежнікаў, якія пагражалі пагалоўю капытных на тэрыторыі краіны.
Самы буйны экземпляр ваўка ў пасляваенныя гады, вагой 54 кілаграмы быў здабыты на тэрыторыі Бярэзінскага заказніка ў 1952 годзе, з тых часоў максімальная вага ваўка са здабытых роўная 53 кг, мінімальная — 30 кг, Максімальны ўзрост ваўкоў у прыродзе — 13-15, у няволі 16-20 гадоў.
Колькасць ваўкоў, якія жывуць у паляўнічых угоддзях Беларусі, складае 1500 асобін, штогод забіваецца каля 60% улічаных асобін.
