МІНСК, 4 сту — Sputnik. Вучні і педагогі Астрашыцка-Гарадоцкай школы прадставілі навагодняе шоу і прывезлі падарункі жыхарам падшэфнага дома-інтэрната для пенсіянераў і інвалідаў, па традыцыі ў мерапрыемстве прыняў удзел малодшы сын кіраўніка дзяржавы Мікалай Лукашэнка, паведаміў тэлеканал СТВ у вячэрняй праграме навін.
Школа, дзе вучыцца Мікалай, кожны год прывозіць падарункі і паказвае навагодняе прадстаўленне для сваіх сяброў. Як паведаміў тэлеканал, сям'я Аляксандра Лукашэнкі кожны год удзельнічае ў навагодніх дабрачынных мерапрыемствах, старэйшыя сыны ў рамках акцыі "Нашы дзеці" прывезлі падарункі ў сацыяльна-педагагічны цэнтр у Маскоўскім раёне беларускай сталіцы.
Як распавялі ў эфіры СТВ, 3 студзеня Мікалай прыняў удзел у навагоднім шоу для жыхароў школы-інтэрната і падарыў двух львінагаловых трусоў, якія гадаваліся на падворку кіраўніка дзяржавы.
Паведамляецца, што жыхары дома-інтэрната былі расчуленыя такім мілым падарункам. Экзатычнага труса рыжаватай афарбоўкі Мікалай уручыў пажылой жанчыне.
У сюжэце было агучана, што праграму "Навагодні агеньчык", якая была прадстаўлена 3 студзеня, рыхтавалі ўсёй школай. Малодшы Лукашэнка выканаў некалькі фартэпіянных твораў. Акрамя трусоў і шоу, жыхары дома-інтэрната атрымалі садавіну і мёд з прэзідэнцкага падворка.
Як год таму паведамляў Sputnik, у студзені 2017-га ў гэтай установе творчая група школы падрыхтавала для інвалідаў і пенсіянераў прадстаўленне "Мадагаскар" (па матывах аднайменнага мультфільма), у якім Мікалай выканаў ролю льва Алекса. Тады ж пастаяльцам прывезлі "прэзідэнцкія" прадукты — смятану, тварог і малако з гаспадаркі кіраўніка дзяржавы.
