МІНСК, 24 сту — Sputnik. Абраз "Божая Маці Вастрабрамская" пакажуць у Вялікім тэатры Беларусі, паведамілі Sputnik у прэс-службе тэатра.
Гэты помнік датуецца ХІХ стагодддзем і зараз захоўваецца ў фондах Музея старажытнабеларускай культуры Цэнтра даследаванняў беларускай культуры, мовы і літаратуры Нацыянальнай акадэміі навук. У музей ён патрапіў з касцёла ў Кобрыне.
"Абраз з'яўляецца спісам (копіяй) цудадзейнага абраза "Божай Маці Вастрабрамскай", які і па сённяшні дзень знаходзіцца ў Вільні — колішняй сталіцы Вялікага Княства Літоўскага. Размешчаны ён у каталіцкай капліцы над Вострай Брамай — адной з гарадскіх брамаў, ад чаго і атрымаў сваю назву "Вастрабрамская". Абраз шануецца як цудадзейны, а таму паводле традыцыі з яго рабіліся спісы: выява спісвалася для іншых храмаў, бо людзі верылі, што гэтыя спісы возьмуць ад святыні частачку гаючай сілы. Спісы таксама маюць такую ж назву — "Божая Маці Вастрабрамская", — патлумачылі спецыялісты.
Асаблівасцю іканаграфіі спісаў з'яўляецца тое, што Багародзіца тут паўстае адна, без дзіцяці. Магчыма, іканапісец імкнуўся на сваім творы паказаць Дзеву Марыю ў той момант, калі да яе нечакана з нябёсаў спусціўся Арханёл Гаўрыіл і прынёс ёй вестку пра тое, што яна народзіць дзіця.
Пра гісторыю цудадзейнага абраза раскажа дырэктар Музея старажытнабеларускай культуры, кандыдат мастацтвазнаўства Барыс Лазука.
Вечар у Вялікім тэатры працягнецца балетам "Страсці" (Рагнеда) Андрэя Мдзівані, які расказвае пра падзеі тысячагадовай даўніны, пра старажытны Полацак і князёўну Рагнеду.
