МІНСК, 24 сту — Sputnik. Сіноптыкі абвясцілі аранжавы ўзровень небяспекі ў Беларусі на чацвер, 25 студзеня, з-за галалёду, паведамілі Sputnik ў Белгідрамеце.
Згодна з прагнозам надвор'я на 25 студзеня, у чацвер будзе воблачна з праясненнямі, а на большай частцы краіны пройдуць ападкі ў выглядзе дажджу і мокрага снегу.
У многіх раёнах Беларусі ў чацвер чакаецца галалёд, а на дарогах — галалёдзіца. З-за гэтага сіноптыкі абвясцілі на 25 студзеня аранжавы (перадапошні) узровень небяспекі.
Ёсць і станоўчы бок: у чацвер у Беларусь прыйдзе пацяпленне. Уначы тэмпература паветра складзе ад —2 да —8, у некаторых раёнах да —12 градусаў, удзень 0… —5. Па захадзе удзень слупок тэрмометра можа падняцца да + 1… + 3.
Параўнальна цёплае, але пры гэтым дажджлівае надвор'е захаваецца ў Беларусі да канца бягучага тыдня. Якім будзе надвор'е ў апошнія дні студзеня і пачатку лютага, сіноптыкі пакуль не гавораць.
