МІНСК, 24 сту — Sputnik. Дзяржаўны музей гісторыі беларускай літаратуры запрашае наведвальнікаў на часовую літаратурна-мастацкую экспазіцыю "Шляхецкія быліцы Адама Міцкевіча", прысвечаную 220-годдзю з дня нараджэння паэта, паведамілі Sputnik арганізатары.
Экспазіцыя з'яўляецца пачаткам святочных падзей у юбілейны год. На ёй прадстаўлена шляхецкая гасцёўня ХІХ стагоддзя, дзе сустракаліся сябры, чыталі творы, музіцыравалі.
"Падчас адкрыцця экспазіцыі ў гасцей з'явіцца ўнікальная магчымасць упершыню ўбачыць метрычны запіс аб хросце Адама Міцкевіча (1798 г.), метрычны запіс аб шлюбе Мацея Маеўскага і Ганны Гарэшкі (дзядуля і бабуля Адама Міцкевіча, 1763г.), метрыку аб хросце маці пісьменніка Барбары Маеўскай (1769 г.), а таксама прыклад такіх запісаў — рукапісныя метрычныя кнігі Ішкальдскага касцёла першай трэці ХІХ стагоддзя", — падкрэслілі ў музеі.
Акрамя гэтага, гасцей чакаюць майстар-класы ад школы танцаў ХІХ стагоддзя "Капітэль".
Дзе: вул. М. Багдановіча, 13 (Дзяржаўны музей гісторыі беларускай літаратуры)
Калі: 1 лютага, 17:00
