МІНСК, 13 лют – Sputnik. Выстава ювелірных вырабаў і аўтарскіх эмаляў Пятра Кузьміча "Метамарфозы" адкрыецца ў гомельскай Карціннай галерэі Г. Х. Вашчанкі 1 сакавіка.
У дзвюх залах галерэі будуць прадстаўлены аўтарскія ювелірныя ўпрыгажэнні і эмалі мастака. Наведвальнікі змогуць убачыць брошкі, кулоны, пярсцёнкі, зробленыя з выкарыстаннем каштоўных і паўкаштоўных камянёў і матэрыялаў.
Пётр Кузьміч — мастак-ювелір, які нарадзіўся ў 1987 годзе ў Брэсце. Працуе ў розных напрамках: ювелірнае мастацтва, кераміка, гарачая эмаль, жывапіс, скульптура, арт-аб'екты. Удзельнічаў у аднаўленні ракі прападобнай Еўфрасінні Полацкай. Работы Пятра Кузьміча знаходзяцца ў фондах Нацыянальнага цэнтра сучасных мастацтваў (Мінск), прыватных калекцыях у Беларусі і за мяжой.
