МІНСК, 14 лют – Sputnik. Адкрыццё выставы "Калекцыя малюнкаў і апісанняў Ліфляндыі Іагана Крыстафа Бротцэ" адбудзецца 20 лютага ў Цэнтральнай навуковай бібліятэцы імя Якуба Коласа Нацыянальнай акадэміі навук Беларусі.
Малюнкі Бротцэ выкананыя тушшу, акварэллю або пяром на таніраванай вадзянымі фарбамі паперы. На іх можна ўбачыць замалёўкі ўнікальных будынкаў ХVІІІ стагоддзя — храмаў, замкаў, паркаў, маёнткаў, жылых дамоў Рыгі, Ліфляндыі, Курляндыі, Эстляндыі, з якіх вельмі няшмат захаваліся да пачатку XXI стагоддзя. На малюнках можна разгледзець выявы прадстаўнікоў розных этнічных груп, якія жылі ў Рызе ў 70-90-я гады XVIII стагоддзя, нават убачыць асаблівасці іх адзення. Іаган Бротцэ дакладна капіяваў гербы, манеты, гарадскія планы, старыя гравюры і тэхнічныя навінкі свайго часу, таму яго малюнкі – сапраўдная скарбніца ведаў эпохі мастака.
Мерапрыемства арганізавана сумесна з Пасольствам Латвійскай Рэспублікі ў Рэспубліцы Беларусь і Акадэмічнай бібліятэкай Латвійскага універсітэта. Выстава прымеркаваная да 100-гадовага юбілею Латвіі.
Падчас адкрыцця выставы, якое адбудзецца 20 лютага ў 16:00, запланавана ўрачыстая цырымонія перадачы латвійскім калегам беларускіх выданняў па гісторыі, антрапалогіі, архітэктуры, кнігазнаўстве, літаратуразнаўстве, мовазнаўстве. Цэнтральная навуковая бібліятэка НАН Беларусі таксама атрымае кнігі гуманітарнага профілю ў дар ад Акадэмічнай бібліятэкі Латвійскага ўніверсітэта.
Калі: з 20 лютага да 30 сакавіка, пн-пт, 09:00 – 19:30.
Дзе: Мінск, вул. Сурганава, 15, Цэнтральная навуковая бібліятэка НАН Беларусі.
