МІНСК, 27 лют — Sputnik. Навукоўцаў будуць прэміраваць за распрацоўкі ў лячэбнай і ваеннай сферах, паведамляецца ў пастанове НАН Беларусі ад 1 лютага 2018 года. Матэрыяльнае стымуляванне навукоўцы атрымаюць таксама за навукова-даследчую дзейнасць у галіне абароны ад надзвычайных сітуацый і ў сферы нацыянальнай бяспекі.
Надбаўкі прадугледжаны за важнасць выконваемай працы і за ўклад работніка ў развіццё бюджэтнай навуковай арганізацыі.
Пастанова распаўсюджваецца на адносіны, якія ўзніклі з 1 студзеня 2018 года. У снежні 2017 года прэзідэнт падпісаў указ "Аб аплаце працы работнікаў бюджэтных навуковых арганізацый". У ім было ўстаноўлена права Акадэміі навук па згодзе з Міністэрствам працы і сацыяльнай абароны і Міністэрствам фінансаў вызначаць пералік надбавак для супрацоўнікаў бюджэтных навуковых арганізацый. Таксама згодна з гэтай пастановай аплата працы навукоўцаў павінна падвысіцца да трохсот адсоткаў, рашэнне аб павышэнні могуць прымаць як кіраўнікі саміх арганізацый, так і органы дзяржаўнага кіравання.
