МІНСК, 1 сак — Sputnik. Беларускія абітурыенты і студэнты, якія атрымліваюць ці хочуць атрымаць вышэйшую адукацыю ў галіне атамнай энергетыкі, могуць скарыстацца квотамі, якія выдзелены Беларусі ў рамках праграмы падрыхтоўкі кадраў для ядзерна-энергетычнай галіны.
Каб скарыстацца адным з вылучаных па квотах месцаў, суіскальнікам з Беларусі неабходна да канца сакавіка зарэгістравацца на сайце, запоўніць заяву на навучанне, паказаўшы да шасці жаданых ВНУ ў парадку прыярытэту і ўзровень навучання (бакалаўрыят, спэцыяліст, магістратура або аспірантура ў залежнасці ад пажаданага ўзроўню адукацыі). Таксама варта сабраць і загрузіць на сайт неабходныя дакументы.
Наступным этапам могуць стаць вочныя сумоўі. Кандыдаты, адабраныя па квоце, ужо могуць лічыць сябе будучымі студэнтамі — і чакаць залічэння ў адзін з выбраных ВНУ.
Усяго ў спісе "атамных" ВНУ — 11 навучальных устаноў у розных рэгіёнах Расіі (ад Масквы і Санкт-Пецярбурга да Екацярынбурга і Томска) на чале з маскоўскім Нацыянальным даследчым ядзерным універсітэтам МІФІ. У ім навучаюцца замежныя студэнты з 44 краін свету, у тым ліку каля 50 грамадзян Беларусі.
"Навучанне ў расійскіх ВНУ па квотах "Расатама" адкрывае перад студэнтамі не толькі доступ да атрымання выдатнай адукацыі, але таксама шырокія перспектывы для далейшага развіцця кар'еры — як у Беларусі, так і ў Расіі ці іншых краінах. Праўда, хачу адзначыць, што да гэтага часу ўсе нашы студэнты вярталіся ў Беларусь — усё ж такі ў нас будуецца свая ўласная АЭС", — адзначыў прафесар, дэкан фізічнага факультэта Беларускага дзяржаўнага універсітэта Віктар Анішчык.
