МІНСК, 21 сак — Sputnik. Барабаншчык легендарнага гурта The Beatles Рынга Стар пасвечаны ў рыцары, паведамляюць СМІ.
Цырымонія ўшанавання выбітных брытанцаў прайшла ў Букінгемскім палацы 20 сакавіка. 77-гадовага музыку ў рыцары пасвяціў спадчыннік брытанскага пасаду прынц Уільям.
"На самой справе, гэта значыць вельмі шмат. Гэта азначае прызнанне рэчаў, якія мы зрабілі. Мне сапраўды вельмі прыемна атрымаць гэта", — сказаў Стар.
Журналісты пацікавіліся ў новаспечанага рыцара, ці хоча ён, каб яго называлі сэр Рынга, як прадугледжвае новы статус, Стар адказаў, што яшчэ не вызначыўся з гэтым пытаннем.
Стар распавёў, што перад цырымоніяй ён папрасіў парады ў Пола Макартні, які носіць званне рыцара ўжо 21 год, як паводзіць сябе на мерапрыемстве. Той сказаў яму, што галоўнае — увесь час усміхацца.
Брытанскія дыпламаты знялі сваю версію знакамітага фота The Beatles >>
Рашэнне аб прысваенні рыцарскага звання Стару было прынята ў канцы снежня 2017 года каралевай Вялікабрытаніі Лізаветай II.
У кастрычніку 1965 года ўся "ліверпульская чацвёрка" ў поўным складзе была ўзнагароджана тытулам кавалераў ордэна Брытанскай імперыі. У рыцарскую годнасць першым з квартэта быў узведзены Пол Макартні — 21 год таму.
