МІНСК, 23 кра — Sputnik. Расійскі дзіцячы пісьменьнік Эдуард Успенскі падаў заявы ў Генеральную пракуратуру, Следчы камітэт і Падліковую палату з-за выхаду новых серый мультфільма "Прастаквашына".
Абноўленая версія мультфільма "Прастаквашына" была прадстаўлена ў пачатку красавіка і прыцягнула вялікую ўвагу гледачоў: першая серыя сабрала больш за 13 мільёнаў праглядаў. Яшчэ на стадыі падрыхтоўкі праекта аўтар кніжнай серыі Успенскі выказваў незадаволенасць фактам здымак серыяла, аднак канфлікт са стваральнікамі мультфільма так і не быў вырашаны.
Нарэшце, пасля выхаду новай серыі мультфільма Успенскі вырашыў афіцыйна падаць заявы ў Генпракуратуру, Следчы камітэт і Падліковую палату. Па словах пісьменніка, ён дазволу на выкарыстанне сваіх твораў не даваў.
"Новая серыя ўяўляе сабой грубую перапрацоўку маіх твораў, змяшчае запазычанні сцэн, тэкстаў (у перапрацаваным выглядзе) і створаных мною персанажаў. Дагавор на выкарыстанне маіх твораў для стварэння новых фільмаў са мной не складаўся, дазволаў на дадзеную экранізацыю я не даваў ", — гаворыцца ў лісце Успенскага, дакумент цытуе RNS.
Звярнуўся вядомы пісьменнік і да акцёраў Гарыка Сукачова, Юрыя Мяньшова і Івана Ахлабысціна, якія былі задзейнічаныя ў агучванні мультфільма — іх ён просіць адмовіцца ад удзелу ў праекце.
У студыі "Саюзмультфільм" заяўлялі пра тое, што спрабавалі ўрэгуляваць канфлікт з пісьменнікам. Студыя па-ранейшаму спадзяецца на вырашэнне сітуацыі шляхам перамоваў. Раней у "Саюзмультфільме" заяўлялі пра тое, што Успенскі даваў згоду на здымкі новага мультфільма — восенню мінулага года.
