МІНСК, 26 кра — Sputnik. Новае сховішча на Чарнобыльскай атамнай станцыі планавалася ўвесці ў эксплуатацыю ў маі бягучага года, але тэрмін пераносіцца, пра гэта заявіў экс-кіраўнік Дзяржатама Украіны Георгій Капчынскі падчас тэлемаста Мінск-Кіеў на тэму "32-я гадавіна аварыі на Чарнобыльскай АЭС", які прайшоў у МПЦ Sputnik Беларусь.
"Сховішча ў эксплуатацыю яшчэ не прынята. Планавалася, што яно будзе прынята ў маі бягучага года. На жаль, працы, звязаныя з мантажом і наладкай некаторых сістэм, уключаючы вентыляцыю, сістэму пажаратушэння, сістэму радыяцыйнага кантролю, затрымліваюцца", — распавёў Капчынскі.
Паводле яго слоў, тэрміны здачы аб'екта затрымліваюцца.
"Дай бог, каб аб'ект сховішча ў новай яго канфігурацыі быў уведзены ў эксплуатацыю і атрымаў ліцэнзію ад рэгулюючага органа Украіны да канца гэтага года. Хацелася б на гэта спадзявацца", — сказаў экс-кіраўнік Дзяржатама Украіны.
Цэнтралізаванае сховішча адпрацаванага ядзернага паліва ў дадзены момант будуецца. Ідзе збудаванне пад'язных шляхоў — гэтая праца ўжо завяршаецца.
"Вядуцца работы па нулявых адзнаках, гэта значыць работы па падрыхтоўцы пляцоўкі размяшчэння. Планавалася, што ў цэлым гэта сховішча будзе ўведзена ў эксплуатацыю ў 2019 годзе. Але, думаю, што найбольш верагодны тэрмін — гэта ўсё ж 2020 год", — адзначыў Капчынскі.
Відэамост Мінск-Кіеў на тэму: "32-я гадавіна аварыі на Чарнобыльскай АЭС" прайшоў у чацвер у мультымедыйным прэс-цэнтры Sputnik Беларусь.
