Нават самы пераборлівы госць зможа абраць забавы пад свой густ — праграма Ночы музеяў з кожным годам становіцца ўсё больш насычанай і рознакаляровай.
Мікс адукацыі, танцаў і музыкі ад Мастацкага
Амаль ва ўсіх музеях мерапрыемствы распачнуцца а 19-й, і Нацыянальны мастацкі музей — не выключэнне. Арганізатары абяцаюць лекцыі, інсталяцыі, перфомансы і шмат музыкі.
Усяго ў гэтую ноч музей аб'яднае 14 пляцовак, сярод якіх — музычная пляцоўка, Колер марской хвалі, Колер Усходу, Пляцоўка эксперыментаў і іншае.
Шмат сюрпрызаў наведвальнікаў чакае менавіта ў асяроддзі музыкаў - выступяць Dee Tree, Рэспубліка Паліна і спецыяльны госць, імя якога пакуль што не раскрываецца. Вядома толькі, што гэта любімы электронны праект Беларусі.
Акрамя таго, удзельнікі зладзяць 5 харэаграфічных перфомансаў, а сябры музея раскажуць 8 гісторый аб колеры.
Забавы будуць доўжыцца да 2 гадзін ночы.
Тлумачэнні сноў і забаўкі з Вітаўтам у Гістарычным
Нацыянальны гістарычны музей звяртае ўвагу гасцей на тое, што ноч музеяў — трынаццатая, і запрашае дакрануцца да таямніцаў і незвычайных з'яў.
Напрыклад, ілюстрацыі Сальвадора Далі да "Боскай камедыі" Дантэ Аліг'еры перад гледачамі пяройдуць у чалавечыя целы. За невялічкую плату жадаючыя змогуць набыць чароўны сон, сэнс якога патлумачыць вопытны спецыяліст.
Акрамя таго, госці змогуць пагуляць с Вітаўтам і Ягайлам у іх адмысловую гульню і растлумачыць піктаграмы разам з першабытным чалавекам.
Наведаць дворык музея па традыцыі можна будзе бясплатна. Тут выступяць гурты Nite Nite Nite, Combo Colombo, Jingle Band, а пад іх музыку можна будзе набыць падарункі ручной працы і дызайнерскіх майкі Уладзіміра Цэслера, сфатаграфавацца ў тэматычных фотазонах і паласавацца духмянай кавай.
Адмысловую праграму ў гэты дзень падрыхтавалі і ў філіялах музея.
Музей прыроды і экалогіі запрашае паглядзець на жывых цмокаў, Дом-музей 1-га з'езду РСДРП арганізуе косманоч, а Музей гісторыі беларускага кіно ладзіць рэтраперспектыву.
Патанчыць можна будзе у Музеі гісторыі тэатральнай і музычнай культуры, а прыгатаваць хлеб па бабуліных рэцэптах — у гасцёўні Уладзіслава Галубка.
Чатыры пляцоўкі для "культурнага абмену" ад Ok16
Культурны інкубатар Ok16 таксама не абмежаваўся адной пляцоўкай — Мемарыяльны музей-майстэрня З. І. Азгура, галерэя "Арт-Беларусь", Ok16 і Культурны цэнтр КОРПУС.
Па задумцы арганізатараў, кожная пляцоўка адлюстроўвае канцэпцыю "культурнага абмену".
Ok16 запрашае на лекцыі Кірыла Скарыніна, Аляксея Навумчыка і Марыі Калеснікавай.
Музей Азгура будзе працаваць натурально ўсю ноч - мерапрыемствы тут скончацца а 6-й раніцы 20 мая. Будуць працаваць "Адкрытая майстэрня", праект Cinemascope і пляцоўка FreedomDance.
Культурны цэнтр КОРПУС у гэтую ноч засяродзіць сваю ўвагу на музыцы. Тут выступіць Minsk Improvisers Orchestra, а таксама можна будзе набыць карціны, плакаты, эскізы, фотаздымкі і астатнія асабістыя рэчы ад вядомых #cultHEROES.
Галерэя "Арт-Беларусь", якая з'яўляецца адной з асноўных пляцовак фестываля "Арт-Мінск", прапануе шмат чаго цікавага ад праекта Maximalism — лекцыі і музычныя імправізацыі, а таксама выступы Blagodubski, Verasen і Deech.
Усю ноч тут можна будзе наведаць бар гарбаты і творчыя майстэрні, а таксама набыць смачную ежу.
Беларускія настолкі і каліграфія ад Музея гісторыі літаратуры
Дзяржаўны музей гісторыі беларускай літаратуры ладзіць уласную "Ноч з чырвонага радка". Мерапрыемствы пачынаюцца а 18-й.
Гасцей запрашаюць паслухаць лекцыю ад выдатнага беларускага каліграфа Аляксея Каваля і паўдзельнічаць у майстар-класе па каліграфіі, атрымаць майстар-клас па танцах пачатку ХІХ стагоддзя, адчуць пульс беларускай літаратуры разам з Народным літаратурным тэатрам "Жывое слова", пагуляць у беларускія настолкі і паслухаць музыку ад рок-гурта ":B:N:".
Акрамя таго, на працягу ночы будзе працаваць дзіцячая пляцоўка і аквагрым.
Вандроўка па Беларусі ад "Краіны Міні"
Самы мініяцюрны музей "Краіна Міні" падрыхтаваў бясплатныя тэматычныя экскурсіі з падарункамі. Яны будуць праходзіць кожныя 45 хвілін, пачынаючы з 19:30.
Акрамя таго, тут можна будзе павандраваць па Беларусі ў акулярах віртуальнай рэальнасці. За адну ноч госці музея змогуць пабываць у знакамітых беларускіх мясцінах і наведаць самыя выбітныя славутасці.
