МІНСК, 17 мая — Sputnik. Музыка Піліп Беспамылковы працягвае радаваць аматараў беларускай мовы — малады чалавек зняў новы кліп.
На відэа ён падтрымлівае ўчынак 11-гадовай дзяўчынкі са Смаргоні, якая вучыла расійскага вядучага Максіма Галкіна называць краіну "Беларусь, а не Белоруссия". Па сюжэце кліпа герой Беспамылковага спачатку глядзіць тэлевізар, дзе на кожным тэлеканале вядучыя выкарыстоўваюць назву "Белоруссия". Раззлаваны малады чалавек выкрадае дзяўчат-тэлевядучых і вучыць іх правільна называць краіну — "Рэспубліка Беларусь".
"Калі нас раззлаваць, зачапіць за жывое, мы не будзем трываць, нанясем нажавое", — папярэджвае выканаўца.
Музыка апісвае адметнасці Беларусі, сярод якіх — бязвізавы рэжым, шмат яблак і ажын, чысціня, смак дранікаў і хлеба і многае іншае, і пытаецца ў турыстаў: "Ну што яшчэ вам трэба?".
Пад псеўданімам Піліпа Беспамылковага хаваецца былы футбаліст Юрый Юрчанка. Зараз Юрчанка жыве і працуе ў Маскве. Акрамя таго, ён піша песні і здымае патрыятычныя трэш-кліпы. Да гэтага хлопец ужо прызнаваўся ў любові роднай мове і беларускай бульбе.
