МІНСК, 24 мая — Sputnik. Вялікая колькасць тапалінага пуху ў гэтым годзе звязана з цёплай вясной і адсутнасцю замаразкаў, распавёў Sputnik старшы навуковы супрацоўнік Інстытута эксперыментальнай батанікі НАН Беларусі Аркадзь Скуратовіч.
Мінчане напярэдадні заўважылі незвычайна вялікую колькасць тапалінага пуху ў паветры. Пра такія ж "тапаліныя снегапады" паведамляюць па ўсёй рэспубліцы — гэта не толькі нязручна, але і непрыемна для алергікаў.
Чакаем дажджу
"Сапраўды, у гэтым годзе вельмі шмат тапалінага пуху. У нас была цёплая вясна, не было замаразкаў. Усё, што завязалася — апала і паляцела", — распавёў Sputnik батанік.
Паводле слоў спецыяліста, чым даўжэй захаваецца гарачае і сухое надвор'е, тым даўжэй тапаліны пух будзе лётаць у паветры.
"Калі пройдуць дажджы, то пух "прыб'е", пасля гэтага ён у паветра падымацца не будзе. Але магчыма, што потым яшчэ нейкая колькасць паляціць з дрэў", — адзначыў Скуратовіч.
Тэрміны "снегападаў" тапалінага пуху будуць залежаць толькі ад надвор'я, адзначыў спецыяліст. Лётаць пух можа да двух тыдняў.
Як змагацца з тапаліным пухам?
Высаджаныя ў гады аднаўлення гарадоў, сёння таполі дастаўляюць шмат нязручнасцяў у постсавецкіх краінах. У многіх з дрэвам змагаюцца не першы год. У Маскве, напрыклад, запушчана праграма па замене таполяў на хвоі.
"Замяняць дрэвы можна. Вядома, таполі — больш хуткарослыя віды, за 15-20 гадоў яны вырастаюць вельмі моцна. Акрамя таго, у іх ёсць і карысная функцыя: яны збіраюць шмат шкодных рэчываў з паветра, куды больш, чым іглічныя", — пракаментаваў спецыяліст.
Калі ў рэспубліцы вырашаць замяніць таполі на іншыя дрэвы, батанік парэкамендаваў бы ліпы — нягледзячы на тое, што яны часцей хварэюць, гатунак гэты ўласцівы рэспубліцы і прыемны вачам.
"Самы правільны метад барацьбы з пухам — высаджванне толькі мужчынскіх саджанцаў. Ад іх пасля цвіцення ніякага пуху няма, ён ёсць толькі ад жаночых. Рабіць гэта проста: дастаткова ад тополя-"мужчыны" ўзяць галінку ў зямлю, з вялікай верагоднасцю вырасце дрэва", — параіў Скуратовіч.
Такім метадам могуць скарыстацца і жадаючыя высадзіць хуткарослыя дрэвы каля дарогі ці за горадам.
"Радыкальны метад — абрэзка "пад аловачак", тады год ці два пуху ад таполяў не будзе. Але многія скардзяцца, што выглядае гэта непрыгожа. І не самы лепшы гэта спосаб барацьбы з пухам", — сказаў на заканчэнне вучоны.
