МІНСК, 5 чэр — Sputnik. Беларускія турысты не могуць зарэгістравацца для падачы на польскую візу — з праблемамі сутыкаюцца як пры звароце праз візавы цэнтр, так і праз само консульства.
Лета — традыцыйны сезон адпачынкаў і замежных паездак. Зрэшты, адпачынку ў Еўропе можа пазбавіцца нейкая частка беларусаў: многія скардзяцца на немагчымасць атрымаць польскі "шэнген".
"Хацеў падацца на візу "за пакупкамі", паколькі тэрмін дзеючай хутка скончыцца. Вельмі складана зарэгістравацца на падачу ў візавы цэнтр — увесь час кажуць, што няма дат. Знаёмы сказаў, што ў маі тэлефанаваў на працягу двух тыдняў і запісаўся на сярэдзіну ліпеня. На самім сайце пасольства даты выбраны аж да 31 ліпеня", — паскардзіўся Sputnik чытач Раман.
Сапраўды, на сайце візавага цэнтра дат для рэгістрацыі няма — ні ў Мінску, ні ў Брэсце, ні ў іншых абласных цэнтрах. "Няма дат ні па адной мэце. Будуць даты — будзе норм працаваць", — напісаў на форуме адзін з падарожнікаў.
Sputnik звярнуўся з пытаннем аб тым, што адбываецца, да аднаго з турыстычных агенцтваў, якія аказваюць паслугі па афармленні шэнгенскіх візаў. "Усё так. Запісу на сайце па ўсёй Беларусі пакуль наогул няма", — адказалі ў турагенцтве.
Ні ў кол-цэнтр, ні ў консульства Sputnik датэлефанавацца не ўдалося. Пакуль прычыны праблемы невядомыя. Як і тое, ці змогуць беларусы атрымаць польскую візу, або ім прыйдзецца экстрана карыстацца паслугамі пасольстваў іншых краін.
Штогод Польшча выдае беларусам дзясяткі тысяч шэнгенскіх віз — лічбы даходзяць да чатырохсот тысяч. Сярод краін Еўропы Польшча — відавочны лідэр па колькасці выдадзеных грамадзянам рэспублікі віз.
