МІНСК, 14 чэр — Sputnik. Цэнтралізаванае тэсціраванне па рускай мове пройдзе ў Беларусі ў гэты чацвер, паведамляе Sputnik.
Цэнтралізаванае тэсціраванне — асноўны этап уступнай кампаніі ў ВНУ. Абітурыенты па ўсёй рэспубліцы здаюць тэсты па выбраных прадметах, а пасля атрымання сертыфікатаў падаюць іх у прыёмныя камісіі выбраных навучальных устаноў.
Першае ЦТ адбылося ў аўторак 12 чэрвеня — абітурыенты пісалі іспыт па беларускай мове. У чацвер адбудзецца яшчэ адзін экзамен — па рускай мове.
Як і ў папярэднія гады, руская мова — самы папулярны на тэсціраванні прадмет. Зарэгістраваліся на выпрабаванне па ім 66907 чалавек.
Тэсты пачнуцца ў 11:00, аднак прыбыць у пункты правядзення абітурыентам неабходна як мінімум за паўгадзіны. Што трэба ведаць аб правілах ЦТ — чытайце ў спецыяльнай памятцы Sputnik.
Вынікі ЦТ па рускай мове павінны з'явіцца на працягу дзесяці дзён — гэта значыць да 24 чэрвеня.
