Назіраць за тым, што адбываецца на вуліцах Масквы і ў фан-зонах, не менш цікава, чым за футбольнымі матчамі, адзначыла карэспандэнт інфармацыйнага агенцтва Sputnik Беларусь Алена Васільева. Горад у літаральным сэнсе запаланілі заўзятары, і не толькі лацінаамерыканскія, хоць іх чуваць нашмат гучней, чым усіх астатніх.
"Публіка, як ні дзіўна, апынулася вельмі спакойнай. Вельмі здзівіла, як скончыўся матч Расіі і Саудаўскай Аравіі не ў плане ліку, а атмасферай. Расійскія заўзятары танцавалі, спявалі і рабілі ўсё, што належыць пераможцам. Сірыя сумавала, сціпла седзячы ў пераходах метро, і жартавала над паразай. Лацінаамерыканскія заўзятары ў чаканні гульняў сваіх каманд вялі сябе нашмат больш шумна, чым расіяне пасля першага пераможнага матчу", — распавяла Васільева.
Абсалютна гатовымі да прыёму гасцей апынуліся прадаўцы сувеніраў і супрацоўнікі сферы абслугоўвання ў цэлым. Яны самі прызнаваліся ў тым, што такога наплыву турыстаў не было ніколі.
"Калі Беларусь імкнецца сыходзіць ад тэмы дранікаў і кажа, што ў нас яшчэ і замкі, напрыклад, то калі турыст прыязджае ў Расію з намерам убачыць матрошку і балалайку, ён усё гэта ўбачыць. Мядзведзяў не бачыла, але напэўна і яны таксама дзесьці ходзяць", — сказала Васільева.
У 2018 годзе Расія ўпершыню ў сваёй гісторыі прымае Чэмпіянат свету па футболе. Турнір будзе доўжыцца да 15 ліпеня 2018 на 12 стадыёнах у 11 гарадах краіны: Маскве, Калінінградзе, Санкт-Пецярбургу, Валгаградзе, Казані, Ніжнім Ноўгарадзе, Самары, Саранску, Растове-на-Доне, Сочы і Екацярынбургу.
Поўную версію размовы з карэспандэнтам Sputnik Беларусь Аленай Васільевай слухайце ў аўдыёзапісе.
