Роўна за год да старту II Еўрапейскіх гульняў адбылася ўрачыстая цырымонія адкрыцця легендарнага стадыёна "Дынама" ў Мінску. Удзел у мерапрыемстве прынялі прэзідэнт Беларусі Аляксандр Лукашэнка і кіраўнік Міжнароднай асацыяцыі лёгкаатлетычных федэрацый Себасцьян Коэ.
Пасля прывітальных слоў Лукашэнка ўручыў ключ ад стадыёна спартсменам і націснуў кнопку, пасля чаго пачаўся зваротны адлік часу да старту Еўрапейскіх гульняў-2019.
Затым на стадыёне прайшла першая спартыўная падзея — лёгкаатлетычная эстафета юнакоў і дзяўчат з розных рэгіёнаў Беларусі. Перамогу святкавалі спартсмены з Віцебскай вобласці.
Пасля на газон "Дынама" выйшлі футбалісты. Матч паміж аб'яднанай камандай брэсцкага і мінскага "Дынама" і зборнай клубаў Беларусі завяршыўся перамогай "дынамаўцаў" — 4: 3.
Сёння арэна прыме міжнародны матч паміж зборнымі Балканскіх, Балтыйскіх краін, Беларусі і Украіны. Пачатак у 18:30.
