МІНСК, 26 ліп — Sputnik. Беларусаў і ўкраінцаў могуць вызваліць ад неабходнасці праходзіць сумоўе на рускай мове пры атрыманні расійскага грамадзянства, паведамляюць РІА "Новости" са спасылкай на прэс-службу Міністэрства ўнутраных спраў.
На дадзены момант у ведамстве вядуць працу над законапраектам, які ўнясе змены ў закон "Аб грамадзянстве Расійскай Федэрацыі". Калі ўсе неабходныя працэдуры будуць праведзены, праект паступіць ва ўрад.
Як адзначаецца ў паведамленні, у Беларусі руская мова з'яўляецца адной з дзяржаўных, а грамадзяне Украіны выкарыстоўваюць яе ў сямейным коле і культурнай сферы, акрамя таго, па менталітэту яны блізкія да расіянаў.
У цяперашні час для атрымання грамадзянства Расійскай Федэрацыі неабходна мець від на жыхарства, пражываць у краіне не менш за пяць гадоў з моманту яго атрымання, мець пастаянную працу з афіцыйным заробкам, валодаць рускай мовай і адмовіцца ад іншага грамадзянства.
